အွန်လိုင်းမှ လေယာဉ်ပျံလက်မှတ်ဝယ်ယူခြင်း
မောင်ထက်ခိုင် ခရီးထွက်ပါအုန်းမည်။ ဒီအချိန်ဒီအခါမှာ ခရီးထွက်လို့ အကောင်းဆုံးပါ။ ဓါတ်ဆီဈေးကလည်း ကျ။ လေယာဉ်ပျံလက်မှတ်တွေလည်း ဈေးကျ။ မောင်ထက်ခိုင်ဘယ်သွားမယ်ဆိုတာကိုတော့ လုံခြုံရေးအရ မပြောတော့ပါ။ နောက်တာပါ။ ပရိတ်သတ်ကြီးသိပြီးဖြစ်တဲ့အတိုင်း ကာလီဖိုးနီးယားပြည်နယ် ဆန်ဖရန်စစ္စကိုမြို့ကို သွားမှာပါ။ လိုက်ချင်ရင် အချိန်မီပါသေးတယ်။ မောင်ထက်ခိုင် ဒီနေ့မှ လေယာဉ်ပျံလက်မှတ်ဝယ်တာပါ။ ဘယ်တော့သွားမှာလဲ။ ခရစ်စမတ်ဟောလီးဒေးပါ။ ခရီးစဉ်တစ်ခုလုံး ခြောက်ရက်လောက်ပဲကြာမှာပါ။ အကြောင်းထူးတော့မရှိပါ။ စိတ်ပြေလက်ပျောက် ခရီးထွက်တာပါ။ နေ့တိုင်းနေ့တိုင်း ပုံမှန်အလုပ်တွေနဲ့ မွန်းကျပ်နေလို့ပါ။ အလုပ်တွေများတဲ့ကြားက အားရက်ကလေးရတုန်း အပြေးအလွှား ခရီးထွက်ရတာပါ။ ဟုတ်ပါတယ်။ မောင်ထက်ခိုင် အလွန်အလုပ်များပါတယ်။ ကိစ္စများမြောင် လူတို့ဘောင် ဆိုတဲ့အတိုင်းပါပဲ။ ရုံးလေးပြေးတက်လိုက်၊။ ကျောင်းလေးပြေးတက်လိုက်။ အလုပ်ကလေးလုပ်လိုက်။ စာလေးကျက်လိုက်။ စာကျက်တယ်ဆိုလို့ ပြောရပါအုန်းမယ်။ မာစတာတန်းများသည် စာကျက်ချိန် အလွန်ယူပါသည်။ အားနေရင် စာလေးကျက်နေမှ တော်ခါကျပါသည်။ မောင်ထက်ခိုင်ကလည်း အားတဲ့အချိန်လေးမှာ ဂိမ်းလေးကစားနေချင်ပါသည်။ မောင်ထက်ခိုင် ဂိမ်းကစားရတာ ကြိုက်ပါတယ်။ လူတစ်ကိုယ် ဝါသနာတစ်မျိုးပေါ့ခင်ဗျာ။ ငယ်ငယ်တုန်းကတော့ ညလုံးပေါက်ကစားခဲ့ဖူးပါတယ်။ အခုများတော့ အိပ်ရေးပျက်မခံနိုင်တော့ပါ။ လေယာဉ်ပျံလက်မှတ်ဝယ်တဲ့ အကြောင်းဆက်ပါအုန်းမည်။ ပထမတော့ မောင်ထက်ခိုင် ပရိုက်စ်လိုင်းဒေါ့ကွန်ကို သွားကြည့်ပါတယ်။ ထွက်ချင်တဲ့အဲပို့ရယ် သွားချင်တဲ့အဲပို့ရယ် သွားချင်တဲ့ရက်ရယ် ပြန်ချင်တဲ့ရက်ရယ် အရင်ရွေးရပါတယ်။ အချိန်လည်း ထည့်လို့ရပါတယ်။ တချို့က မနက်သွားချင်ပြီး တချို့က ညနေသွားချင်တတ်ကြပါတယ်။ မောင်ထက်ခိုင်ကတော့ ရုံးဆင်းမှ သွားမယ်ပေါ့နော်။ ညနေကို ရွေးလိုက်ပါတယ်။ ဒီမှာက အဲပို့တွေက အများသားလား။ အဲပို့ကုဒ်လည်း ရှာထည့်ရပါသေးတယ်။ အဲပို့ကုဒ်မသိရင်တော့ မြို့နံမယ်ထည့်လည်း ရတော့ရပါတယ်။ ဒါပေမယ့် မြို့အကြီးကြီးမှာ အဲပို့နှစ်ခု သုံးခုရှိနေရင်တော့ ခက်ပါပြီ။ မောင်ထက်ခိုင်ကို လာကြိုမယ့် သူငယ်ချင်းက သူနဲ့နီးတဲ့ အဲပို့ကို ပြောပြထားလို့ မောင်ထက်ခိုင်အတွက် အခက်အခဲမရှိပါ။ တကယ်တော့ အဲပို့ကုဒ်ရှာရတာလည်း ခက်ခက်ခဲခဲမဟုတ်ပါဘူး။ မြို့နံမယ်ထည့်လိုက်ရင် အဲဒီမြို့က အဲပို့ကုဒ်တွေ ထွက်လာပါလိမ့်မယ်။ ကိုယ်နဲ့ အဆင်ပြေမယ့် အဲပို့ကုဒ်ထည့်လိုက်ရုံပါပဲ။ လိုအပ်တဲ့ အချက်အလက်တွေ ထည့်ပြီးတော့ ရှာတဲ့ခလုတ်ကို နှိပ်လိုက်ပါတယ်။ မိနစ်ဝက်လောက်စောင့်လိုက်ရင် ပေါ်လာပါပြီ။ အချိန်ဇယားနဲ့ ဈေးနှုန်းဇယားပါ။ အသက်သာဆုံးဈေးက အပေါ်ဆုံးမှာပါ။ ဒါပေမယ့် မောင်ထက်ခိုင်သွားချင်တဲ့ အချိန်တော့မဟုတ်ပါဘူး။ ထားပါတော့။ သွားချင်တဲ့အချိန်ရဲ့ ဈေးကိုကြည့်လိုက်တော့ ဒေါ်လာတစ်ရာလောက်ကွာနေပါတယ်။ တိတိကျကျပြောရရင် တစ်ရာသုံးဆယ့်ကိုးဒေါ်လာ ကွာပါတယ်။ မဖြစ်သေးပါ။ တနေ့တည်းမှာ မနက်ဈေးတစ်မျိုးနဲ့ ညနေဈေးတစ်မျိုး ဖြစ်နေပါတယ်။ မနက်ပိုင်း သွားရင်ပိုပြီး ဈေးသက်သာပါတယ်။ အေးလေ။ မောင်ထက်ခိုင်က အချိန်ဇယားဆွဲတဲ့သူမှ မဟုတ်တာ။ ဈေးသတ်မှတ်သူလည်း မဟုတ်ပါ။ ဒီတော့ သူတို့ သတ်မှတ်တဲ့ဈေးပဲပေါ့။ ဒီလိုနဲ့ အသက်သာဆုံးလက်မှတ်ကိုပဲ ဝယ်ဖြစ်သွားပါတယ်။ ဝယ်မယ်လုပ်တော့ အဲလိုင်းဝက်ဆိုက်ကို သွားကြည့်မိလိုက်ပါတယ်။ အဲလိုင်းဝက်ဆိုက်က ဝယ်ရင် ခုံရွေးလို့ရပါတယ်။ ပရိုက်စ်လိုင်းဒေါ့ကွန်က ဝယ်ရင်တော့ ခုံရွေးလို့မရပါဘူး။ လေယာဉ်ပေါ်မှာ ထိုင်ခုံရွေးရရင် မောင်ထက်ခိုင် လူသွားလမ်းဘေးကထိုင်ခုံကို ရွေးပါတယ်။ ပြူတင်းပေါက်ကို ဘယ်တော့မှမရွေးပါ။ ထွက်ရတာခက်လို့ပါ။ ပြူတင်းပေါက်ကို ရွေးတော့ရော ဘာထူးမှာလဲ။ တိမ်တွေကို တချိန်လုံးထိုင်ကြည့်နေမှာမှ မဟုတ်တာ။ မောင်ထက်ခိုင်တို့ကတော့ ပျံသန်းချိန်တလျှောက်လုံး အိပ်မှာပါခင်ဗျာ။ မအိပ်ရင်လည်း မောင်ထက်ခိုင် စာအုပ်တစ်အုပ်ဖတ်မှာပါ။ စာမဖတ်ရင်လည်း အိုင်ဖုန်းနဲ့ သီချင်းနားထောင်မှာပါ။ သီချင်းနားမထောင်လည်း လပ်တော့နဲ့ ဒီဗီဒီ ကြည့်မှာပါ။ ဟဲဟဲ။ ကြွားစရာလည်း မကျန်တော့ပါ။ ကုန်သလောက်ရှိသွားပါပြီ။ ဒါတောင် အိုင်ဖုန်းမဝယ်ခင်က ဝယ်ထားသော အိုင်ပေါ့အကြောင်းမပြောရသေးပါ။ အင်တာနက်ခေတ်ကြီးမှာ အွန်လိုင်းကနေ လေယာဉ်ပျံလက်မှတ်ဝယ်တာ မထူးဆန်းပါဘူး။ အင်တာနက်ပေါ်မှာ အားလုံးဝယ်လို့ရပါတယ်။ မောင်ထက်ခိုင်ဝယ်တော့မှ အထူအဆန်းလုပ်ပြီး လျှောက်ရေးနေတာပါ။ အရင်တုန်းကလည်း ဝယ်ဖူးပါတယ်။ ဘလော့မရေးသေးတော့ ဘယ်သူ့ကိုမှ မပြောဖြစ်ခဲ့ပါ။ အခုတော့ ပရိတ်သတ်ကြီးအားကိုးနဲ့ ရေးချလိုက်ပါပြီ။ သည်းခံပြီး ဖတ်ကြပါကုန်။
No comments:
Post a Comment
Note: Only a member of this blog may post a comment.