လက်ထပ်စာချုပ်

လက်ထပ်စာချုပ်

မောင်ထက်ခိုင်တစ်ယောက် ဒီနေ့ ရုံးမှာ ခွက်ထိုးခွက်လန် ရယ်စရာတစ်ခု ကြုံခဲ့ပါတယ်။ ပရိတ်သတ်ကြီးတော့ ရယ်ရချင်မှ ရယ်ရမယ်။ ကာယကံရှင်နဲ့ မောင်ထက်ခိုင် အတွက်တော့ မျက်ရည်များတောင် ထွက်အောင် ရယ်ရပါတယ်။ ဖြစ်ပုံက ဒီလိုပါ။ မောင်ထက်ခိုင် ရုံးစာတစ်စောင်ကို ကော်ပီလုပ်ပါတယ်။ အစည်းအဝေးမှာ ဝေဖို့ပါ။ အစောင် နှစ်ဆယ်လောက်ပေါ့။ ပရိတ်သတ်ကြီး သိတဲ့အတိုင်းပဲ ကော်ပီအခန်းထဲက အောအင်ဝမ်း စက်ကြီးနဲ့ပေါ့။ ကော်ပီရော ပရင့်ရော ဖက်စ်ရော စကန်နာရော အားလုံးပေါင်းထားတဲ့ စွယ်စုံရစက်ကြီးပါ။ မောင်ထက်ခိုင်ကလည်း အတတ်ဆန်း ထွင်ပါတယ်။ အစောင်နှစ်ဆယ် တစ်ခါတည်းမပရင့်ဘဲ ပထမဆုံးတစ်ကော်ပီပဲ ပရင့်ထုတ်လိုက်ပါတယ်။ ပြီးမှ ကော်ပီသက်သက် ကူးမယ်ပေါ့။ ဒီလိုနဲ့ ပထမဆုံး ကော်ပီကို ပရင့်ထုတ်၊ ကော်ပီစက်ထဲပြန်ထည့်၊ ကော်ပီကူးပါတယ်။ ပထမဆုံး ကော်ပီကို မစစ်ဆေးတော့ပါဘူး။ အစောင်နှစ်ဆယ် ကော်ပီကူးပြီးတော့ အစည်းအဝေးကို တန်းသွားလိုက်ပါတယ်။ အစည်းအဝေးရောက်တော့ ကော်ပီတွေကို မဝေဖြစ်သေးပါဘူး။ အစည်းအဝေးစပါတယ်။ စာရွက်တွေ ဝေမယ်ဆိုပြီး ရုတ်တရက် ကြည့်လိုက်တော့။ ဟိုက်ရှားဘား။ လက်ထပ်စာချုပ် ကော်ပီကြီး ဖြစ်နေပါတယ်။ ဘယ်လိုဖြစ်တာလဲ။ ရုံးစာကနေ လက်ထပ်စာချုပ်ကို အရှင်လတ်လတ်ကြီး ဘဝပြောင်းသွားပါလိမ့်ပေါ့။ တော်ပါသေးရဲ့။ ကော်ပီစာရွက်တွေ မဝေမိသေးလို့။ ဒီအချိန်မှာ ဟိုတလောက လက်ထပ်လိုက်တဲ့သူက အစည်းအဝေးအခန်းထဲကို ပြေးဝင်လာပါတယ်။ အူယားဖားယားနဲ့။ မောင်ထက်ခိုင် ရိပ်မိလိုက်ပါပြီ။ သူက သူ့လက်ထပ်စာချုပ်ကော်ပီကို ပရင့်ထုတ်တာပါ။ သူ့စာရွက်က မောင်ထက်ခိုင်ရဲ့ စာထက်အရင် ထွက်လာတာကိုး။ မောင်ထက်ခိုင်က သေချာမကြည့်ဘဲ သူ့လက်ထပ်စာချုပ်ကို ယူပြီး ကော်ပီ အစောင်နှစ်ဆယ် ကူးပစ်လိုက်ပါတယ်။ အစည်းအဝေးမှာ မဝေရသေးတာ အလွန်ကံကောင်းပါတယ်။ လူကြီးတွေက ထင်မှာပေါ့။ မောင်ထက်ခိုင် နောက်တီးနောက်တောက်လာလုပ်တယ်လို့။ အားလုံးကို တောင်းပန်ပြီး သူနဲ့ မောင်ထက်ခိုင် အစည်းအဝေးခန်းထဲက ထွက်လာပါတယ်။ အပြင်ရောက်မှ တစ်ယောက်မျက်နှာ တစ်ယောက်ကြည့်ပြီး ရယ်လိုက်ရတာ။ သူ့လက်ထဲမှာက မောင်ထက်ခိုင်ရဲ့ ရုံးစာ။ သူကလည်း စိတ်မဆိုးတတ်လို့ တော်ပါသေးတယ်။ ရယ်လို့အားရတော့မှ ကော်ပီအခန်းထဲကို အမြန်ပြေးပြီး ရုံးစာကို ကော်ပီလုပ်ရပါတယ်။ မျက်နှာပိုးသတ်ပြီး အစည်းအဝေးခန်းထဲ ပြန်ဝင်တော့ လူကြီးတွေက မေးပါလေရော။ မောင်ထက်ခိုင်လည်း ချော်လဲရောထိုင်နဲ့ စာရွက်ကျန်လို့ ပြန်ယူတာလို့ ပြောလိုက်ရပါတယ်။ လက်ထပ်စာချုပ် အကြောင်းတော့ တစ်ခွန်းမှ မဟပါခင်ဗျား။

ပိုက်ဆံအိတ်တစ်လုံး ဝယ်ယူခြင်း

ကောင်မလေးတွေ ပိုက်ဆံအိတ်လှလှလေးတွေ ကိုင်ကြပါတယ်။ မောင်ထက်ခိုင် အစတုန်းကတော့ အမှုမဲ့ အမှတ်မဲ့ပါပဲ။ လုံးဝကို သတိမထားမိတာပါ။ အပြင်သွားရင် ထည့်စရာအိတ်တစ်လုံးလိုသည်ပေါ့။ မောင်ထက်ခိုင်အတွက်ကတော့ အိတ်ဖြစ်ရင်ပြီးတာပါပဲ။ ကျောပိုးအိတ်၊ ဘေးလွယ်အိတ်၊ လက်ဆွဲအိတ်၊ တခါတလေ ကျွပ်ကျွပ်အိတ်တောင်ပါသေး။ ထည့်စရာ ပစ္စည်းကြီးရင်ကြီးသလို အိတ်ကြီးကြီးသယ်တဲ့အခါလည်း ရှိရဲ့။ အိတ်မပါတဲ့ အခါလည်း ရှိရဲ့။ အမျိုးမျိုး အထွေထွေပါပဲ။ သေချာတာကတော့ အိတ်မရွေးတာပါ။ ကြုံတဲ့ အိတ်ကို ကြုံသလို ထည့်လိုက်တာပါပဲ။ မောင်ထက်ခိုင် ထည့်စရာ အိတ်မရွေးတာကို ပြောတာပါ။ ကောင်မလေးများကတော့ ဒီလိုမဟုတ်ပါ။ ဒီခရီး ဒီအိတ်နဲ့သွားမှ၊ ဒီလမ်းမှာ ဒီအိတ်မပါလို့ မဖြစ်ပါ ဆိုတာတွေရှိပါတယ်။ ထားပါတော့လေ။ မောင်ထက်ခိုင်ပြောချင်တာ ကောင်မလေးများ အကြောင်းမဟုတ်ပါ။ ကောင်မလေးတစ်ယောက် အကြောင်းဖြစ်ပါသည်။ မောင်ထက်ခိုင်ရဲ့ သူမ ပေါ့ခင်ဗျာ။ သူမ အိတ်လှလှလေးတွေ တော်တော် ကြိုက်ပါသည်။ အိတ်လှလှလေးတွေလည်း သူမဆီမှာ တော်တော်များများ ရှိပါသည်။ ဒါပေသိ သူမကတော့ အိတ်ကလေးများကို တွေ့တိုင်း ကြုံတိုင်းဝယ်နေဆဲပါ။ တခါတလေ သူမ ကြိုက်သော အိတ်ကလေးများဆိုရင် ရောင်စုံဝယ်ချင်ပါသေးသည်။ သူမက တံဆိပ်ကိုလည်း ကြည့်ပါသေးသည်။ သူမမှာ တံဆိပ်နဲ့ တန်ဖိုးကို တွက်ရချက်ရတာလည်း အမောပါပဲ။ မောင်ထက်ခိုင်ကတော့ အမြဲတမ်း ဒီလိုထင်ပါသည်။ တံဆိပ်ကောင်းကောင်းလိုချင်ရင် တန်ဖိုးများများပေးရပါမည်။ ဒီလို ထင်ထားသော မောင်ထက်ခိုင်တစ်ယောက် အမှားကြီးမှားပါတော့သည်။ ဖြစ်ပုံကတော့ မပြောပါနဲ့တော့ ပရိတ်သတ်ကြီးရယ်။ မောင်ထက်ခိုင် သူမအတွက် လက်ကိုင်အိတ်ကလေးတစ်လုံး ဝယ်ပြီး လက်ဆောင် ပေးမလို့ပေါ့။ ဒါနဲ့ပဲ သူမရဲ့ အိတ်ပေါင်းစုံကို လိုက်ကြည့်ရပါတော့တယ်။ ဘယ်လိုပုံစံ၊ ဘယ်တံဆိပ်၊ ဘာအမျိုးအစား၊ ဘာအရောင်၊ ဘယ်လောက်၊ မောင်ထက်ခိုင် ခေါင်းတွေ မူးနောက်သွားပါတယ်။ ဈေးကြီးကြီးပေးရင် အိတ်ကောင်းကောင်းရမယ် ဆိုသော မောင်ထက်ခိုင် လက်မှိုင်ချရပြီပေါ့။ အိတ်လှတိုင်းလည်း ဈေးမကြီးပါ။ အိတ်သေးတိုင်းလည်း ဈေးမပေါပါ။ တံဆိပ်ကလည်း စကားပြောပါသေးတယ်။ သူမ ကြိုက်တတ်သော အရောင်ကိုလည်း ရွေးရပါဦးမယ်။ အရောင်ဆိုလို့ ပြောရပါအုန်းမယ်။ ပရိတ်သတ်ကြီးသိတဲ့အတိုင်းပဲလေ ဒီနိုင်ငံမှာ ရာသီကိုလိုက်ပြီး အရောင်ရွေးကြတာမဟုတ်လား။ နွေဦးရာသီ၊ နွေရာသီ၊ ဆောင်းဦးရာသီ၊ ဆောင်းရာသီ။ အရောင်တွေမျိုးစုံကို သူ့ရာသီနဲ့ သူ့အရောင် ဝတ်ရပါတယ်။ အဝတ်အစားပြောင်းသလို အိတ်လည်း ပြောင်းရပါသေးတယ်။ အလွန်အလုပ်ရှုပ်သော၊ ခေါင်းစားသော အရောင်ရွေးချယ်ရေးပါ။ သူမကတော့ အရောင်ရွေးရတာကို သဘောကျပါသတဲ့။ ပျော်ဖို့တောင်ကောင်းသေးဆိုပဲ။ သူမဆီမှာ အိတ်ရောင်စုံရှိနေတော့ မောင်ထက်ခိုင် ဗျာများရပြီပေါ့။ သူမမှာ မရှိသေးသောအရောင်ကို ပေးချင်တာကိုး။ ဒါမှလဲ မောင်ထက်ခိုင် အမှတ်ကောင်းကောင်းရမှာပေါ့။ ဒီလိုနဲ့ မောင်ထက်ခိုင်တစ်ယောက် မောလ်ဆိုသော ကုန်တိုက်ဈေးကြီးကို ရောက်ပြီးသကာလ လက်ကိုင်အိတ်ဆိုင်တွေကို လျှောက်ငေးမိပါတော့တယ်။ လျှောက်ရွေးတယ်လို့ ပြောတာပါ။ ဘုမသိဘမသိနဲ့ တောင်ကြည့်မြောက်ကြည့်ပေါ့။ ဒီပါတ်မန့်စတိုးကြီးတွေကလည်း ဟီးနေတာပါပဲ။ အရောင်းစာရေး၊အရောင်းစာရေးမလေးများကလည်း ပျူပျူငှါငှါနဲ့ပေါ့။ အစ်ကိုကြီး ဘာရှာသလဲ။ ဘာကူညီရမလဲ။ မောင်ထက်ခိုင်လည်း သဘောကောင်းပုံရတဲ့ အရောင်းစာရေးမချောချောလေးကို ချဉ်းကပ်လိုက်ပါတယ်။ ဟုတ်တယ်လေ။ ပိုက်ဆံအိတ် ဆက်ရှင်မှာ သူက တာဝန်ကျတာကိုး။ မောင်ထက်ခိုင်လည်း ဟိုင်း ဟောင်းအာယူပေါ့။ လေပေးလေးလည်း ဖြောင့်သွားရော မောင်ထက်ခိုင်ရဲ့ အခက်အခဲကို တင်ပြလိုက်ပါတယ်။ ပိုက်ဆံအိတ်လှလှလေး ဝယ်ချင်ကြောင်း၊ ခေတ်စားနေတဲ့ ဒီဇိုင်းနဲ့ အရောင်လေးလည်း ရှာပေးဖို့အကြောင်း။ တံဆိပ်တွေ အကြောင်းလဲ သိပ်နားမလည်ပါဘူး။ ဒီမှာတင် မောင်ထက်ခိုင်ရဲ့ အယူအဆကို ရှင်းပြလိုက်ပါတယ်။ ဈေးကြီးရင်ကောင်းသည်ပေါ့ခင်ဗျာ။ အရောင်းစာရေးမလေးကလည်း ထောက်ခံပါတယ်။ မှန်တာပေါ့။ ဟုတ်တာပေါ့။ သူက ထောက်ခံမှာပေါ့။ ဈေးကြီးကြီးအိတ်ရောင်းရရင် သူ ကော်မရှင်ပိုရမှာကိုး။ ဒီတော့ သူက ဈေးကြီးကြီးတွေပြပါလေရော။ ပထမတော့ မောင်ထက်ခိုင်မရိပ်မိသေးပါ။ အိတ်လေးတွေက တစ်ခုထက် တစ်ခု လှလာတယ်ပေါ့။ လှမှာပေါ့။ ဈေးက ကြီးသထက် ကြီးလာတာလေ။ သူက ပြ၊ မောင်ထက်ခိုင်က ရွေးနဲ့၊ ကောင်တာပေါ်မှာ အိတ်တွေ ပုံလာပါပြီ။ မောင်ထက်ခိုင်လည်း အားနာနာနဲ့ ရပ်သင့်ပြီပေါ့။ ပြပြီးတဲ့ အပုံထဲက တစ်အိတ်ကို ကောက်ကြည့်လိုက်ပါတယ်။ မြတ်စွာဘုရား။ ဈေးက ခေါင်ခိုက်နေပါလား။ ဘာအိတ်မို့လို့လဲ။ ဂူချီ တဲ့ခင်ဗျာ။ ဒီဆိုင်မှာ ဂူချီအိတ်ပဲ ရောင်းပါသတဲ့။ ကောင်းရော။ မောင်ထက်ခိုင်တစ်ယောက် တောသားမြို့ရောက် လူလည်လုပ်ပြီး ဝင်လိုက်တဲ့ဆိုင်က ဂူချီ ဆိုင်တဲ့ ခင်ဗျာ။ အဲဒါမှ ခက်ပြီ။ ပြန်ထွက်ရလည်း အခက်။ ပြထားတဲ့ အိတ်တွေကို တစ်အိတ်မှ မကြိုက်ဘူး ငြင်းရလည်း အခက်။ ကျဉ်းထဲကျပ်ထဲ။ ရှက်ကလည်း ရှက်။ အားနာတာက တစ်ဖက်။ အရောင်းစာရေးမချောချောလေး ရှေ့မှာ ချွေးဒီးဒီးကျချင်စရာပေါ့။ သူကတော့ ထင်တော့မှာပဲ။ ဒီလူ ဝယ်လည်းမဝယ်ဘဲ ဟိုကြည့်ဒီကြည့်နဲ့။ ချွေးတွေလည်း ပြန်လို့။ မောင်ထက်ခိုင်ဘက်က ကြည့်တော့လည်း သူ့ဟာသူ ရောင်းချင်လို့ ပြတာ။ ဘယ်တတ်နိုင်မလဲပေါ့။ နောက်ဆုံးမှာတော့ မောင်ထက်ခိုင် စိတ်လျှော့လိုက်ပါတယ်။ ဖြစ်ချင်တာ ဖြစ်။ သူအထင်သေးတာတော့ မခံနိုင်ပါ။ အားနာတာလည်း ပါတာပေါ့။ နောက်မှ ကြည့်ရှင်းမယ်ဆိုပြီး ပြထားတဲ့အထဲက အကြိုက်ဆုံး အိတ်တစ်လုံးကို မျက်စိမှိတ်ပြီး ဝယ်လိုက်ပါတော့တယ်။ မဝယ်လို့လည်း မဖြစ်တော့။ ဟိုအိတ်ကိုင်လိုက် သက်ပြင်းချလိုက်၊ ဒီအိတ်ကိုင်လိုက် သက်ပြင်းချလိုက်နဲ့။ ကောင်မလေးကတော့ ပိုက်ဆံရှင်းပြီးမှပဲ ဟင်းချနိုင်ပါတော့တယ်။ မဟုတ်ရင် သူ ပြန်သိမ်းရမှာတွေက အများကြီးလေ။ မရောင်းလိုက်ရရင် အချိန်ကုန် လူပင်ပန်းနဲ့ မောင်ထက်ခိုင်ကို ကျိန်ဆဲမလား မသိပါ။ အခုတော့ ကျေးဇူးတင်ပါတယ်။ နောက်လည်း လာအားပေးပါနော်။ အပြုံးလေးနဲ့ ကျေးဇူးတင်စကားပြောလိုက်ပါတယ်။ ကောင်းသောနေ့ဖြစ်ပါစေ လို့တောင် ဆုတောင်းပေးလိုက်ပါသေးတယ်။ မောင်ထက်ခိုင်တစ်ယောက်တော့ မအီမလည်နဲ့ ဆိုင်ထဲက ထွက်လာပြီး ဆိုင်းဘုတ်ကို မော့ကြည့်လိုက်တော့မှ ဂူချီ ဆိုတဲ့ စာလုံးကြီးက ပြုံးပြလိုက်ပါတယ်။ မအူမလည် မောင်ထက်ခိုင်ပါ။ ဘာပဲဖြစ်ဖြစ်ပါ။ သူမ ပျော်ရွှင်သွားတာကို ကြည့်ပြီး ဖြစ်ရတဲ့ ပီတိကတော့ ပိုက်ဆံနဲ့ ဝယ်လို့မရပါဘူးလေ။ သူမကို ဂူချီအိတ် ဘယ်လို လက်ဆောင်ပေးတယ်ဆိုတာ နောက်ထပ် ပို့စ်တစ်ခုရေးပြီး ပရိတ်သတ်ကြီးကို ပြောပြပါဦးမယ်။ အခုကတော့ ရယ်စရာ အဖြစ်အပျက်အနေနဲ့ အရင် ပြောပြတာပါ။ ကြွားတာ မဟုတ်ပါခင်ဗျား။

စနေသီဟ

မောင်ထက်ခိုင်ရဲ့ ဂိမ်းကစားတဲ့ ဘဝလေးကို နည်းနည်း ရှင်းပြချင်လို့ ဒီပို့စ်တင်တာပါ။ အမှားပါသွားခဲ့ရင် ခွင့်လွှတ်ဖို့ ကြိုပြီး တောင်းပန်ချင်ပါတယ်။

သူများတွေ ပွါးတော့ စနေသီဟလဲ ဖိန့်ဖိန့်နဲ့ ဝင်အာလိုက်ဦးမယ်။ တနေ့သ၌ တီစီလူမိုက်အလောင်းအလှာလေး အကောင်းစားလေး စနေသီဟရဲ့ ချစ်လှစွာသော အသည်းလေး ကောင်မလေးတစ်ယောက်ဟာဖြင့် မြန်မာကျူးပစ်ဆိုတဲ့ ဖိုရွမ်မဟာကြီးမှာ ဟိုကြည့်ဒီကြည့်ပေါ့နော်။ တိုတိုပြောရရင်။ ဟမ် ဘာမှမပြောရသေးဘူး ကိုစနေသီဟရဲ့ (ပိတ်သတ်ကြီးရဲ့ အသံ) ။ ထားပါတော့။ သူမက တီစီ သရက်ကို ဝင်ကြည့်မိပါတယ်။ သူမက စနေသီဟ ဂိမ်းကစားတာကြိုက်တယ် ဆိုတာသိထားတော့ ပြန်ပြောပြတာပေါ့နော်။ ဘယ်သူကတော့ ဘယ်လိုချလိုက်ကြောင်း ဘယ်လိုနှက်လိုက်ကြောင်း အားရပါးရကို ပြောတော့တာပဲဗျာ။ ဒီလိုနဲ့ ကျနော်လည်း စိတ်ဝင်စားပြီး တီစီ အကောင့်တစ်ခု ဖွင့်လိုက်ပါတယ်။ ပထမတော့ ရိုးရိုးပဲ ထရိန်းပါတယ်။ သူမကိုလည်း ချော့မော့ပြီး တီစီသရက်ကို ဖတ်ခိုင်းရပါသေးတယ်။ ဒီမှာ ဘာသွားတွေ့လဲဆိုတော့ ကိုတီးရဲ့ အိမ်ငှါးမည်ဆိုတဲ့ ကြော်ငြာလေးကို သွားတွေ့ပါတယ်။ ကိုတီးရေ ကူညီပါအုန်း ဆိုတော့ ပထမ ဗီလာလေး ငှါးပေးပါတယ်။ နောက်တော့ ကိုတီးတစ်ယောက် ဖက်ကျသွားပါတယ်။ တီးပါတီဆိုပြီး တီစီမှာ တော်တော်ကို ကြီးကြီးကျယ်ကျယ်ဖြစ်သွားပါသေးတယ်။ အိမ်စုတ်လေးမှာပြန်နေရင်း သီချင်းဆိုဆိုနေတော့ (ဘာမှလဲမဆိုင်ဘူး) ကိုလီယိုကြီးရဲ့ မန်းရှင်း မဲဖောက်ပွဲကြီးကို သူမက ဖတ်ပြီး ပြောပြပါလေရော။ အဲဒီမှာ ကျနော်ဗျာ မန်းရှင်းနဲ့ နေချင်စိတ်တွေ တဖွားဖွားနဲ့ ထိန်းမနိုင်သိမ်းမရ ပေါ်လာပါတော့တယ်။ ဒါနဲ့ပဲ ကိုလီယိုကို တီစီမှာ မေးလ်ပို့ပြီး စုံစမ်းကြည့်တော့ အဲ့လူကြီးက မြန်မာကျူးပစ်က မင်ဘာမှ မဲဖောက်ပွဲမှာပါလို့ ရမယ်တဲ့။ အဲဒီအချိန်တုန်းက စနေသီဟက မြန်မာကျူးပစ်မဟုတ်သေးပါဘူး။ ဖိုရမ်ဂျွိုင်းဖို့ကလဲ အဲဒီတလောက ပိတ်ထားပါတယ်။ သူမကို အပူကပ်ပြီး ပို့စ်တင်ခိုင်းတော့ သူမက အဖြစ်သည်းရန်ကော ဆိုပြီး အင်္ဂလိပ်လို တင်ပေးပါတယ်။ အဲလို စနေသီဟ ရောဂါတက်နေချိန်မှာ ကယ်တင်မယ့် ခပ်ချောချော အစ်ကိုကြီးတစ်ယောက် ပေါ်ပေါက်လို့လာပါတယ်။ ကိုထုဆစ်သူက ကျနော့်ကို ဖိုရမ်ဂျွိုင်းဖို့ ဖိတ်ခေါ်ပေးပါတယ်။ စနေသီဟတစ်ယောက် တင်းပြည့်ကျပ်ပြည့် မြန်မာကျူးပစ် လူမိုက်လက်သစ်တစ်ယောက်ဖြစ်လာပါရော။ ဒီလိုနဲ့ ကိုလီယိုရဲ့ မန်းရှင်း မဲဖောက်ပွဲကြီးကို ဆင်နွဲပြီးသကာလ မန်းရှင်းတစ်လုံး မဲပေါက်ပါတယ်။ တသက်နဲ့တကိုယ် မဲပေါက်ဖူးတာပါ။ ကိုမောင်နမ့်ကလည်း လက်ဆောင်တစ်ခုပေးပါသေးတယ်။ မမှတ်မိတော့တာကို ခွင့်လွှတ်ပါခင်ဗျာ။ မန်းရှင်းကြီးနဲ့ နေပြီးတော့ ဘာမှ မယ်မယ်ရရ မလုပ်ဖြစ်သေးပါဘူး။ကိုလီယိုကြီးက ထွင်ပြန်ပါရော။ စကားပုံဆက်တဲ့ ဂိမ်းတဲ့။ ဝင်ပါတဲ့လူကို တစ်သန်းပေးမယ်တဲ့။ ဟာ ဒါဆိုရင် စနေသီဟတို့ ဘယ်နေမလဲ။ အပြေးအလွှားပါရပြန်ပြီပေါ့။ (ပါလေရာကြီးကို ဖြစ်လို့)။ အခုပြန်တွေးကြည့်တော့ ဒီဂိမ်းကို ကစားဖြစ်သွားတာ ကျေးဇူးတင်ရမယ်။ အခု စနေသီဟကို အကူအညီပေးနေတဲ့ အမာခံ ဘော်ဘော်တွေကို အဲ့ဒီဂိမ်းမှာ စပြီးသိကျွမ်းခင်မင်ခဲ့ရလို့ပါ။ နံမယ်တွေတော့ ထုတ်မပြောတော့ပါဘူး။ အားလုံးလည်း သိပြီးသားဖြစ်မှာပါ။ သူတို့နဲ့ ပေါင်းမိတော့မှ ပိုပြီး အက်တစ်ဖြစ်လာပါတယ်။ တီစီအကြောင်းလေး တီးမိ ခေါက်မိ ရှိလာတော့ မာလတီလေး ကိုင်ချင်လာပါတယ်။ မာလတီကိုင်မယ်ဆိုတော့ မြှောက်ပေးသူက ကိုသူရိန်။ ချသာချတဲ့။ ကြည့်ပါဦး။ သူက အကုန်ထောက်ပံ့မယ်တဲ့ဗျား။ မြှောက်ပေးသူရှိမှတော့ စနေသီဟတို့ ဘာလို့မမိုက်ရဲ ရှိပါ့မလဲ။ အကောင့်မွေးသည်ပေါ့ခင်ဗျာ။ ဇာတ်လမ်းလေးကို ဒီနေရာမှာရပ်လိုက်ပါအုန်းမယ်။ (ဟာ မီးပျက်သွားတာလား ပိတ်သတ်ကြီး အော်သံ)။ အချိန်ရရင် ဆက်ရန် ကျန်ပါသေးတယ်။ စနေသီဟ အကြောင်းကို တဖွဲ့တနွဲ့ရေးတာကို သည်းခံပြီး ဖတ်ပေးတဲ့ ပိတ်သတ်ကြီးကို အထူးပဲ ကျေးဇူးတင်ပါတယ်။

စနေသီဟ