Wednesday, January 14, 2009
လက်ထပ်မင်္ဂလာ
ဒီနေ့ ရုံးက လုပ်ဖော်ကိုင်ဖက်တစ်ယောက် အီးမေးလ်ပို့လာပါတယ်။ သူက ဗာကေးရှင်းသွားတာ နှစ်ပတ်လောက်ရှိပါပြီ။ သူ့နိုင်ငံကို ပြန်ပြီး သူ့အမေကို သွားတွေ့မယ်လို့ ပြောသွားပါတယ်။ ဆိုင်းမဆင့် ဗုံမဆင့်နဲ့ လက်ထပ်ပြီး ပြန်ရောက်လာပါတယ်။ သူမိန်းမရပြီ ဆိုတာကို တစ်ရုံးလုံးကို အီးမေးလ်ပို့ပြီး လှည့်ကြွားတာပါ။ သူတို့ မင်္ဂလာဆောင် ဓါတ်ပုံတွေ ဝေဝေဆာဆာနဲ့ပေါ့။ အားလုံးကလည်း အံ့ဩတကြီးနဲ့ ဂုဏ်ယူဝမ်းမြောက်ကြောင်း အီးမေးလ်ပို့ကြပါတယ်။ မောင်ထက်ခိုင်လည်း အံ့ဩမိပါတယ်။ သူ့အတွက် ပျော်လည်းပျော်ပါတယ်။ သူက ပထမ အိမ်ထောင်နဲ့ ကလေးတစ်ယောက် ရှိပါတယ်။ ပထမ အိမ်ထောင်နဲ့ကွဲတာတော့ ကြာပါပြီ။ သူအမြဲပြောတတ်တာလေးတစ်ခု ပြောပြချင်လို့ပါ။ ပရိတ်သတ်ကြီးလည်း ကြားဖူးကြမှာပါ။ နွားနို့တွေ အလကားရနေတဲ့ နေရာမှာ နွားမ တစ်ကောင် ဘာအတွက် ဝယ်မွေးမလဲ ဆိုတဲ့ စကားလေးပါ။ သူက ထပ်ဖြည့်စွက်လိုက်ပါသေးတယ်။ သူ့အတွက်တော့ နွားမ တစ်ကောင်လည်းဝယ်မွေးပြီးပါပြီတဲ့။ အလကားရတဲ့ နွားနို့တွေလည်း သောက်ပြီးပါပြီတဲ့။ နောက်ဆုံးတော့ နွားနို့ကို နွားနို့အနေနဲ့ပဲ သောက်တာကောင်းပါတယ်တဲ့။ အိမ်ထောင်ရေးသုခနဲ့တော့ မရောစေချင်ပါတဲ့ခင်ဗျား။ မောင်ထက်ခိုင်က အတွေးသမားဆိုတော့ ဆက်တွေးမိပါတယ်။ လူတွေ ဘာကြောင့် အိမ်ထောင်ပြုကြသလဲ။ နွားနို့အတွက် တစ်ခုတည်းတော့ ဟုတ်မယ်မထင်ပါ။ အထူးသဖြင့် နွားနို့တွေ အလကားရနေတဲ့ ဒီလိုနေရာမှာပါ။ ဘဝတစ်ခုလုံး လက်တွဲပြီး လောကဓံကို ကြံ့ကြံ့ခံ ဖြတ်သန်းဖို့ ခရီးဖော်လိုအပ်တာပါ။ ခရီးဖော်ကို ရှာတွေ့ရင် ဘဝခရီးအတွက် လက်ထပ်ကြတာပါ။ ဒါကြောင့်လည်း လူ့ဘောင်မှာ လက်ထပ်မင်္ဂလာဆိုတာရှိနေတာပါ။ အရင်တုန်းကလည်း ရှိခဲ့ပါတယ်။ နောင်လည်း ရှိနေဦးမှာပါပဲ။ လူသားတိုင်း ဘဝခရီးဖော်ကို ရှာဖွေတွေ့ရှိကြပါစေ။
Subscribe to:
Post Comments (Atom)
No comments:
Post a Comment
Note: Only a member of this blog may post a comment.